KUMUSTA PILIPINAS? Nag-lockdown pa mo diha ug walay nagtikawtikaw sa palibot? Wala ka nag-inusara kay mao pud kami dinhi sa Davao. Nagpagula ang atong inahan sa syudad nga si Mayor Sara Duterte-Carpio ug kasuguan kabahin sa pagseguro nga luwas ug dili modaghan ang pagkuyanap sa bag-ong sakit nga hilabihan ka mananakod dinhi. Subay usab kini sa kamanduan sa nasudnong kagamhanan nga mag-amping aron dili matakdan sa maong sakit.
Apan taliwala sa katalagman nga atong nasinatian tungod sa “coronavirus disease 2019” (Covid-19), nagpabilin ug miguwa ang mga kinaiyang Pinoy. Una niini ang pagka-pilosopo og dili pagtuman sa sugo sa nakahibalo. Mas gusto nila nga sila ang hawod. Di daw makatakod ang Covid-19 sa mga palainom kay matunaw sa alcohol sa bino de pataranta ang virus.
Giingnan nga dili maglamano ug molikay sa daghang tawo, mangita na man hinuon ug panon nga nagpunsisok ug magbiso-biso nga daw walay kahadlok nga matadkan o makatakod sa uban ilabi na sa Metro Manila diin maoy “mata sa Covid-19 pandemic”. Mosulti pa nga “kung panahon na nga mamatay, nan panahon na gyod!” Wa sila masayod nga ang ilang pagkapilosopo pwedeng makahatag ug kakuyaw sa tibuok niyang banay. Karon hapit na moabot ug 5,000 ka tawo ang namatay sa Pilipinas samtang libuan ang gitawag ug “person under monitoring, probable and suspected” nga matakdan sa maong sakit nga wa pay bakuna nga magamit.
Ang ikaduhang kinaiya sa Pinoy nga motumaw taliwala sa katalagman kay ang pagkamamugnaon o sa ininglis pa kay “creativity” ug “ingenuity”. Matud pa sa mga nagtuon sa kinaiya sa tawo nga eksperto ang Pinoy sa kapa-kapa, tapal-tapal og singit-singit. Busa didto pa mag-ayo sa buslot nga atup kung ting-ulan ug magbagyo na. Way sakit nga dili maayo kung Pinoy ang pa-estoryahon.
Morag kanta ni Max Surban sa kontis sa hambog ang Waray, Ilonggo ug Cebuano. Siyempre kadtong nakahibalo sa kanta nasayod na kung kinsa ang hawod kanila. Yamat ra nga ginapiko og ginapala ang kwarta sa mga “Genuine Ilonggo” nga nag-renew sa ilang hambog matag Biyernes Santo. Ayaw lang bikla ang mga Bol-anon kay basin tinud-on nga mag-independent state na sila ug kinahanglan na’g visa kung moduaw didto. Wala na unya’y suplay sa lamian og maidlot nga calamay de bagul sa Jagna.
Binuang ug tinunto daw kung nganong walay bakuna ang Covid-19 kay kaya kining tambalan ug linat-ang luy-a, hinog nga saging, sabaw sa kalamunggay, tubig init, bino, alisngaw sa init tubig, mangosteen, “virgin coconut oil” ug uban pang haplas. Hinuon may punto ang uban ilabi na nga kung buot hunahunaon, dali rang mamatay ang virus sa mainit nga klema sama sa nasud.
Ang ikatulo nga kinaiya sa Pinoy nga maayong pamarisan kay ang pagkamalaumon o sa diksyunaryo nga ininglis pa kay “hopeful” ug “positive people.” Maapil na dinhi ang kinaiya nga pagkainantuson, pagkamaalampuon og pagkamakigbisugon. Mao nga matingala ang taga laing nasud nga mosud-ong sa Pinoy nga naghilak apan nagkatawa. Gigutom nga nagpahiyom, kabus nga malipayon, ug masakiton nga nag-ballroom. Sa pagkatinuod, sobra nga maalampuon ang Pinoy nga manguros kung moagi atubangan sa simbahan, pagsulod sa dako nga gambayal, pagpangihi ug kung makuratan. Hinunua, kinaiya kini nga nagpakita sa iyang pagtuo sa usa ka Labaw’ng Makagagahom, Magbabaya, ang tigmuna niining tanan.
Ug mao kini nga kinaiya nga buot ipalambo, suportahan, ibandilyo ug ipakaylap sa BANAT PILIPINAS NEWS, ang pinakabag-o nga mantalaang Binisaya ug Tinagalog sa nasud ug kauban sa English version nga SANDIGAN NEWS nga iya sa SANDIGAN PUBLISHING HOUSE. Wala pa kini opisyal nga kahulugan apan mahimo kining hubaron isip Bangon Alang Nasudnong Tingusbawan (BANAT) PILIPINAS – (Rise for National Progress) nga nagpadayag sa pangandoy sa nasud nga motindog taliwala sa daghang pagsulay ug katalagman ning kalibutan.
Usa kini ka plataporma aron ipakita ang adlaw-adlaw nga pakigbisog o pakig-BANAT sa mga yanong lungsuranon, gagmay’ng organisasyon, batok sa kapobrehon, walay panginabuhian, katalagman tungod sa natural ug hinimo sa tawo nga trahendya, inhustisya, kriminalidad ug kurapsyon nga naglipang sa atong katilingban karon.
Buot sa SANDIGAN PUBLICATION HOUSE nga mamahimo usab ang SANDIGAN NEWS ug BANAT PILIPINAS News nga paagi nga makaapil ug makasalmot ang katawhan sa pagpasibaw, paghisgot sa mga isyu nga bililhon kanila, sa pagpangita’g solusyon sa mga problema ug gumunhap sa ilang kinabuhi, ug pagtakda sa direksyon sa ilang kinabuhi.
Buot usab sa BANAT PILIPINAS News nga mahimo kining tulay tali sa mga lungsuranon ug mga ahensiya ug opisyal sa kagamhanan alang sa ilang panginahanglang serbisyong sosyal, programang imprastraktura, panglawas, edukasyon ug uban pa, nga gikan ra usab sa ilang singot ug buhis.
Sa maong mga tinguha, paninguhaon sa BANAT PILIPINAS News nga mamahimo kining “inter-active” o mapa-apilon sa tanan susama sa “social-media” sa internet ug bag-ong teknolohiya sa impormasyon. Bisan may mga “reporters”, “correspondents” ug “contributors” ang BANAT PILIPINAS NEWS ug SANDIGAN NEWS, gusto usab niini nga gikan sa inyo ang mga isyu og balita nga iyang imantala.
Busa nagpasalamat ang SANDIGAN PUBLISHING HOUSE sa inyong mainitong pagdawat sa mga bag-ong sakop sa media nasud nga mabasa usab sa internet ug unta mag-uban kita sa iyang paglawig sa umaabot.
The Editorial Board
